曹仁超文集-第382章
按键盘上方向键 ← 或 → 可快速上下翻页，按键盘上的 Enter 键可回到本书目录页，按键盘上方向键 ↑ 可回到本页顶部！
————未阅读完？加入书签已便下次继续阅读！
月后香港经济不前，其实早喺1997年前，唔少行业已进入恶性竞争期。例如电脑硬件生产商自1984年起边际利润走下坡，至今超过二十年，情况未改善；至于饮食业（尤其酒楼），1987年起便走下坡；报业自1994年起走下坡；航空业1997年起走下坡；半导体生产业2000年起走下坡；甚至房地产项目中，写字楼亦早喺1994年走下坡，1997年回落嘅只系住宅楼价。今年系咪商品股见顶及国际性跨国银行股见顶（本地业务为主嘅银行股，唔少早在1997年见顶）？未来边D行业进入繁荣期？我老曹正在努力找寻中。
资产升值后，必然带嚟资产值回落期。香港楼价由1984年起步至1997年上升十三年，调整50％亦需六年半时间；到2003年第三季，时间上已吻合，此乃2003年第二季我老曹叫大家买豪宅嘅理由。见底后必反弹，但唔代表另一上升周期开始，其他行业亦一样。例如香港酒楼七十年代开始愈开愈多，至1987年达到高潮，1987年10月股灾后，香港酒楼业便开始走下坡，过去二十年内亦有起有跌，但跌嘅日子长、起嘅日子短，今天香港酒楼数目较1987年减少一半或以上。再以报业为例，1994年前大部分报馆皆欣欣向荣，1994年后却需要喺萎缩中嘅空间争取生存机会，边际利润大幅回落，甚至进入恶性竞争，最后进入寡头经济，即只由几份大报纸垄断市场，其余报馆唔系艰苦经营便系被淘汰出局。不但报业如此，其他行业如电影业亦早已走下坡，而且速度更为吓人，连出现寡头经济嘅机会都冇，变成野猫式经营（例如有好剧本便埋班开戏，不然便散 Band），连影后都要到电台兼职做DJ，同六十年代电影业比较真系差天共地。香港电影业七十年代开始自从无线电视普及已走下坡，其后出咗个李小龙，曾令电影业一度强力反弹，自李小龙逝世后，电影公司便买少见少。仲有旅行社亦早喺八十年代开始走下坡。我老曹出嚟社会做事快四十年了，睇住唔少行业性盛衰，1997年前盛嘅行业多、衰嘅行业少，1997年后却系衰嘅行业多、盛嘅行业少。
今年下半年又在敲门，未来展望如何？大前提系香港GDP增长率今年第二季起放缓，但通胀率第三季仍上升，要到第四季才放缓，加上7月份日本银行可能放弃零利率政策。索罗斯话，过去数月日本中央银行已从市场抽走二千亿美元，引发新兴股市5月份起急跌，上述资金不但唔会重新投入市场，恐怕日本7月份起仲会进一步抽走资金。过去三十年日本央行有三次货币供应出现负增长：第一次1981年、第二次1992年、第三次2000年；今年4月系第四次。前三次都令日经平均指数大跌，相信呢次亦晤例外。过去日本货币政策对世界经济影响唔大，但2001年起日本实施零利率政策，成为唔少对冲基金嘅资金提供者，形成呢次日本银行抽资影响力咁大。何况今年4月起嘅抽资行动系环球性，美国、欧洲甚至中国都加入（估计英国亦好快加入），目标系对付高油价，但油价仍顽强地抗跌，睇落呢次环球性中央银行抽资行动，距离结束日子仍远。
我老曹相信，1999年（或2001年）开始嘅原材料上升周期今年5月结束，呢点由铜价近日下调可证明。但CPI上升速度今年第三季才见顶，令利率上升周期极可能维持到8月8日或以后；经济放缓期今年第二季或第三季才开始，明年才结束。黄金反覆上升期由2001年开始，今年5月结束，上阻力七百三十美元，下支持五百四十二美元，喺可见将来估计都喺呢个框框内玩上落市。本周四美国将加息四分一厘兼美元进一步上升，能否将金价喺7月份内逼降至五百四十二美元形成双底？并唔清楚。
奥地利已故画家克林姆（Gustav Klimt） 1907年所画嘅《黄金画作》（Adele Bloch－Bauer I） 6月18日以一亿三千五百万美元（十亿五千万港元）卖出，不但超越2004年5月毕加索嘅《拿烟斗的少年》售价一亿四百万美元，折合八亿一千万港元，同时超过1990年5月日本商人以一亿一千万美元（八亿五千八百万港元，加上通胀因素计）购入梵谷（Van Gogh）嘅《向日葵》。日本股市喺1990年1月回落，房地产1990年6月回落，2004年5月环球股市曾一度回落。呢次《黄金画作》以超高价卖出，美国金融市场及楼市未来的确有D令人担心。
盈大北京地产项目受负面影响
巴黎系个好地方，例如每周两次街边小贩售卖嘅蔬果，都系刚由田上摘回来。路边嘅小型音乐会令人感觉舒畅，河畔旁嘅漫步令人有重返恋爱时期感觉，路旁嘅午餐令人有游闲感觉，同香港熙熙攘攘、匆匆忙忙、分秒必争嘅情景比较，给人另一种生活感觉。到咗巴黎，真系可以完全忘记金融市 场的波动、衍生市场叽拚命……。但喺巴黎生活，费用绝不便宜，一个路边午餐随时要你三十至五十欧罗（净系食 pizza 亦要十欧罗）。换言之，欲享受巴黎嘅浪漫，你必须喺香港金融市场投资成功才可负担，非一般打工仔可以负担得起。法国人比较热情，唔似英国人嘅〃扑克〃面孔，初见面已可一起午餐兼吹水，天南地北讲餐懵（一般都识英文），但亦到此为止，上述只系雾水友谊，绝不可靠。
父亲节前，我老曹两个女儿决定每人送件衫畀我。我老曹两年前答应太太每月减一磅，至今体重已轻咗二十六磅，形成衣服唔合穿，目标系再减五、六磅才停止。不过，点解减肥过程中为何要添新衣呢？由于衣不称身，两个女儿认为我老曹愈嚟愈似倒霉嘅写稿佬，唔似成功嘅投资者！唔知系咪年纪大咗，我老曹早已失去扮靓兴趣，最后拗唔过女儿才添咗两件新衣。唔知其他父亲系咪一如我老曹，好怕去百货公司拣衣服。我老曹感觉系拣衫较拣股票更难，反之女性却好喜欢喺商场内留连，随时可花半天时间仍未够喉，而喺选股票方面却不愿浪费超过十分钟。我老曹经常笑自己太太系 Penny Wise； Pound Stupid！（小钱精明，大钱糊涂），唔知其他女性系咪亦系咁。
北京6月25日消息，电盈（008）日前提议将旗下电讯资产出售，未获中国网通（906）同意，已影响盈科大衍（432）喺北京开发房地产项目嘅计划，包括北京朝阳区建设呼家楼电话局（该地产属中国网通集团所有）；其次系一个价值十亿元人民币嘅豪宅项目；电盈占盈大61％股权。有中国网通协助，令盈大喺北京地产项目上受负面影响并唔奇怪，投资者宜小心。
曹仁超
PDF原文：
原序号：596序号：
46
标题：
富与官争系大忌
来源：
信报
发布日期：
2006…06…27
全文：
6月26日，周一。恒生指数跌4点，收15804。81；成交额二百零二亿一千四百七十一万七千多元。期指微微低水，升20点，收15800点。鞍钢（347）升2。3％，见六元八角；马钢（323）升1。1％，见二元三角五仙，因佢地本身拥有铁矿石矿源，唔受呢次铁矿石入口加价19％影响。
相信本周四联储局将公布自2004年6月以来第十七次加息，利率将见五厘二五。上述影响已被市场消化，问题在于8月8日系咪再加息。上周由亚洲区证券市场流走嘅资金估计达十一亿美元，比较过去五星期平均每周有二十四亿至二十一亿美元流走，可以讲流走速度已减慢，但仍然系流走，而非流入。
恒指失守15200点机会唔大
亚洲区经济虽然已减少依赖出口，但无法摆脱出口带动模式嘅经济，因此亦无法摆脱美国经济嘅影响。以香港为例，显然对出口依赖已大减，但经济盛衰仍由资产值升降所带动，而香港资产值升降无法摆脱资金流入流出嘅影响，结果香港经济继续被美国牵着鼻子走。过去香港企业纯利升幅高峰期分别喺1981、95至97年，以及2000及05年，估计今年企业纯利升幅唔及去年，今年7至9月香港股市将为上述改变而作调整。换言之，5月8日至6月13日恒指大跌后，踏入今年第三季相信进入整固期。个别股份互有升降，整个股市窄幅波动。恒指上阻力16000点、下支持15200点。
5月至今，恒地（012）股价跌幅已相当，较资产净值已有25％折让，进入值得持有期，可利用未来每次出现抛售吸纳。新地（016）较资产值有24％折让，亦到咗可以考虑吸纳嘅水平。换言之，Sell in May者踏入7、8月份，可利用每次股市抛售吸纳。技术上睇，恒指15200点失守机会唔大。
如何喺股票与黄金之间选择？上周五金矿股已略破下降通道，估计金价由七百三十美元回落到五百四十二美元，调整已完成，上周五收市五百八十美元，较高价回落20％，但较去年6月四百三十美元升35％。反之，标普五百指数下降通道仍完整。从呢点睇，黄金再次进入收集期，股票仍可等一等。
中央政府唔会太重手
“十一·五”开局之年，中国经济未出现冷却，1至5月固定资产投资二万五千四百四十三亿元人民币，较去年同期升30。3％，系两年内最高增幅。5月份M_2增长19。1％，贷款升16％（5月份新增贷款系去年同期嘅两倍），外传第二轮宏观调控快出台。中国经济虽然问题多多，但仍系高增长、低通胀格局，相信中央政府唔会过分重手，以免“伤筋断骨”。第二次调控相信仍系微调为主，例如提高市场进入标准、清理整顿在建及拟建专案；对传统产业实施改造及提升效率；鼓励兼并及重组；加强信贷、土地、建设、环保等政策协调。中国M_2对GDP比率已达180％，远高于世界其他国家，一唔小心，可引发恶性通胀或楼市泡沫。让中国经济进入软着陆期，可避免重蹈1994、95及96年经济过热后1997及98年急降温嘅情况。流动资金过剩及产能过剩，大家都有眼睇，依家人行温吞水式货币收紧政策，并不能真正解决问题，而系将问题愈积愈大。产能过剩造成产品大量往外走，变成外贸大量盈馀，回流货币又被银行信贷制度放大，变成流动资金过剩。如今时今日加息，必吸引更多资金流入，造成流动资金进一步过剩；如人民币升值过急，又将令产品出口有困难，可引发内部通缩，走上九十年代日本之路。
2001年中国外贸出口总值二千六百六十一亿美元，去年七千六百二十亿美元，年均增长30。61％，相信今年中国外贸增长率面临调整。2001年7月1日中国新外贸法实施，个体工商户可名正言顺直接出口，系造成出口业高速成长嘅其中一个理由；其次系长三角地区兴起。到今年中国外贸发展逐渐进入高成本期，劳动成本及资源成本压力逐步上升；加上面对国际市场日益增加嘅压力，增长空间渐渐收窄。最近两年因环保及资源压力，今年起国家逐步取消出口商品优惠，减少外资失衡现象，都将令中国外贸出口增长率进入回落期。过去中国出口以数量扩张及低价竞争，产量世界第一，但所获利润十分少。未来出口低成本嘅优势逐步减少，转为科技、品牌取胜，唔再以量取胜，改为着重品质。
中国城市化仍需二十五年
中国经济喺1870年前一直系世界第一，主要系中国一直存在巨国效应，形成过去二千年喺贸易上嘅优势。只系中国错过咗全球工业革命呢个潮流，令过去一百五十年经济走下坡。1978年改革开放后，中国经济一步步融入世界自由贸易体系内，巨国效应又渐渐返嚟。中国十三亿人口所形成嘅规模效益，令任何产品喺中国生产时成本上皆占优势，出口增加令资金流入、利率下降，令经济更高速增长。过去工业革命后中国喺贸易上出现逆差，令白银流失引发通缩，百业走向萧条，鸦片战争嘅结果系进一步开放中国市场，更多白银流失，造成恶性循环；反之，美国1971年取消黄金兑美元政策，则避免咗上述情况喺美国出现。
未来中国劳动成本将增加，出口产品成本亦上升，但巨国效应令竞争力仍十分良好，外贸顺差唔会减少、资金流入造成低利率嘅状况，可继续保持中国经济繁荣落去。除上述外，中国仲有一个优点，就系城市化增长率达每年1。44％，如要达到80％，城市化仍需要二十五年，即未来二十五年中国经济仍将反覆向上。
罗杰斯（七十年代同索罗斯成立量子基金）现年六十三岁；佢去年才开始投资中国股票。佢认为。未来应睇好嘅行业包括：一旅游业；二、农业；三、能源事业；四、航空业。估计未来上述行业股份表现将优于大市（今年上海综合指数升39％，深圳综合指数升50％，成为全球八十个股市中表现最出色嘅十大股市之一）。5月份内地股市成交额较4月升80％。佢认为。内地地产股受压，短期内唔应该投资内地地产股。1999年起佢开始投资能源股及黄金，可以讲大获全胜。佢曾揸电单车走遍全中国，了解中国行情。佢未来睇好嘅农产品有棉花、咖啡、小麦、大豆及糖。本月24日佢喺北京大学“第二届国际能源及金属战略论坛”上讲及投资之道，就系“做足功课”。
佢认为，八十年代开始系债券牛市，但到2003年已结束并进入熊市，因此唔好再沾手债券。喺西方，八十年代股票亦系牛市，但2000年牛市已结束。反之，中国股票熊市在去年底结束，如果唔想投资商品，可以投资中国股票。未来二十年中国经济都系繁荣嘅。佢认为，石油牛市始于1999年，估计2012年才结束；黄金牛市2001年开始，估计2014年才结束，估计到时金价将超过一千美元一盎斯。
Boston Gansulting Graup研究欧洲同日本公司业务，有90％增长嚟自中国业务。
如果你到中国，请到上海睇睇嗰D高楼大厦，你会以为自己嚟纽约。请到北京感受一下塞车之苦，或者去睇睇三峡工程，保证令人下巴跌下来，眼睛瞳孔亦放大！中国近年基建发展之速，令整个中国好似一个大地盘；令八十年代台湾“十大建设”好似玩泥沙！过去中国只欢迎直接投资，唔欢迎间接投资。令内地股票市场未发展起嚟，似足八十年代台湾。随着2007年来临，金融市场开放，中国股票市场迟早出现另一次boom！投资内地股市唔易，但投资红筹国企股一D困难都有。事实上，过去三年红筹、国企股表现亦唔错。
依家内地企业欲“走出去”，但外国资金欲“走进来”。中国企业“走出去”，主要购买天然资源（其他方面投资成绩欠佳），由澳洲嘅天然气、南韩嘅发电厂及炼油设施，以至巴西嘅铁矿石、加拿大嘅油砂，依家已到咗边度有天然资源、边度便有中国投资者嘅地步。至于外资“走进来”最有兴趣系内地金融业、保险业，只系政府仍有一定限制，不然唔少内地银行及保险公司早成为外资收购对象。
八十年代部分港人曾拒绝将工厂内移，今天已后悔莫及；九十年代唔肯投资长三角嘅台湾厂商。亦面对同样问题。二十一世纪忽视红筹、国企者，今天亦唔知应该点算！1980至97年香港经济系内地经济嘅引擎，带动中国经济增长；1997年后中国经济成为香港经济嘅引擎，带动香港经济保持繁荣，相信未来十年仍然系咁。愈嚟愈多香港企业纯利主要来源再唔系香港而系内地，唔少制造业已转型做内销，香港大房地产公司嘅投资亦将重心由香港移入中国内地。中国经济正进入转型期，由制造业及出口业带动转为内部消费带动，
